2030 жылға қарай Қазақстанға миллионға жуық кәсіби техникалық мамандар қажет болады

Жаһандық бәсекелестік және ғылым мен технологияның артып келе жатқан маңыздылығы экономиканың барлық секторында STEM-мамандарға деген қажеттілікті айтарлықтай арттырады (ағылш. science, technology, engineering and mathematics — жаратылыстану ғылымдары, технология, инженерия және математика, техникалық бағыттар үшін жалпылама термин). АҚШ Ұлттық ғылым қорының деректері бойынша 2026 жылға қарай ғылым мен инженерия саласында кадрларға деген қажеттілік 13%-ға, ал жалпы жұмыс күші тек 7%-ға артады. Осыған ұқсас тенденция, яғни, техниктерге деген қажеттіліктің артуы бүкіл әлемде байқалады. Сонымен қатар, Citi Ventures тобының зерттеуі STEM-білімді және STEM-кадрларды дамытуды қолдайтын фирмалардың өз командаларын нығайтып, инновациялық және жауапты брендтердің беделін дамытып жатқанын көрсетті, бұл өз кезегінде, инвесторлар мен клиенттер арасында сұранысты арттырады және бизнес құнына тікелей әсер етеді.

Қазақстандағы бизнес адами капиталды және STEM-кадрларды дамытуға үлкен сұраныстың барын түсінеді. Мысалы, ҚР Еңбек және халықты әлеуметтік қорғау министрлігінің есептеулері бойынша 2030 жылға қарай Қазақстанға миллионға жуық кәсіби техникалық мамандар қажет болады.

Жалпы алғанда, Қазақстанда техниктерге деген қажеттілік мәселесін әр қырынан қарайды. Нәтижесі жоқ емес. Мысалы, жоғары техникалық білім беру көрсеткіштері өте жақсы. Мәселен, 2023/2024 оқу жылында еліміздің жоғары оқу орындарында инженерлік, өңдеу және құрылыс салалары мамандықтары бойынша 97,7 мың студент (жылына 4,6% қосылды), ақпараттық-коммуникациялық технологиялармен байланысты мамандықтар бойынша 56 мың студент (12,1% қосылды), жаратылыстану ғылымдары, математика және статистика саласы мамандықтары бойынша 26,3 мың студент (13,1% қосылды) оқыды. Осы үш бағытта білім алушылардың үлесі студенттердің жалпы санының 30,4%-ын құрайды, бір жыл бұрын 28,8% болатын. Осы бағыттар бойынша 39,4 мың маман білім алып шығады деп күтілуде.

Тағы бір айта кететін жәйт, өзге елдерден келіп жұмыс істейтін техниктер де бар. Мәселен, өткен жылдың қорытындысы бойынша Қазақстанға техникалық мамандығы бар 15 жастан асқан 3,4 мың мигрант келген, бұл өткен жылмен салыстырғанда, бірден 76,4%-ға артық. Сонымен бірге Қазақстаннан 2,3 мың техник маманы қоныс аударды, бұл бір жыл бұрынғы көрсеткішке қарағанда, 46%-ға аз. Яғни, өткен жылдармен салыстырғанда, кеткендерден гөрі келіп жатқан техниктер әлдеқайда көп, көші-қон ағыны өсуде.

Қазақстандық компаниялардың осы заман талабына қалай жауап беретіні туралы көптеген жағымды мысалдар келтіруге болады. Мысалы, Еуразиялық топ (Eurasian Resources Group, ERG) ERG кәсіпорындары орналасқан Ақтөбе, Павлодар және Қостанай облыстарының 24 техникалық және кәсіби білім беретін мекемелерімен, сондай-ақ үш университетпен және халықаралық ұйымдармен («Бір белдеу, бір жол» альянсы, ҚХР, және «Париж Академиясы», Франция) серіктестік орната отырып, Колледждер альянсын құрды. Сонымен қатар, топ орта білім беруді дамытуға, инженерлік-техникалық мамандықтар мен цифрлық технологияларды танымал етуге бағытталған ERG mektepke жобасын төртінші жыл қатарынан жүргізіп келеді. ERG STEM Girls жобасын, болашақ ғалымдарды, инженерлерді және инноваторларды дайындайтын қыздар мектебін ерекше атап өткен жөн, себебі әйелдерді STEM-ге қатыстыру адами капиталды дамытудың негізгі факторларының бірі болып қала береді.