Ал некелесу саны 7% төмендеген

2022 жылдың қаңтар–қазан айларында зергерлік және ұқсас бұйымдар өндірісі өткен жылдың сәйкес кезеңіндегі 1,1 млрд теңгемен салыстырғанда биыл 1,15 млрд теңгені құрады (ақшалай 4,1% өскен). Бұл ретте сектордағы өнім нақты мәнде 3,2% қысқарды.

Анықтама үшін: бір жыл бұрын сектордағы өндіріс құндық мәнде бірден 73,1% (нақты мәнде 65,4%) өскен.

Биыл зергерлік бұйымдардың бағасы айтарлықтай өсті. 2022 жылдың қарашасында алтын неке сақиналары 2021 жылдың қарашасымен салыстырғанда 37,6% қымбаттады. Анықтама үшін: бір жыл бұрын сектордағы баға өсімі 5% болған.

Ең көп қымбаттау Солтүстік Қазақстан облысында байқалды: мұнда алтын сақиналар бір жылда 71,6% қымбаттады. Одан кейінгі орында Жетісу және Алматы облыстары: тиісінше 68,3% және 66,6%. Сондай-ақ Астанада (51,5%), Шығыс Қазақстан облысында (49,9%), Алматыда (48,5%) және Ақмола облысында (44,9%) айтарлықтай өсім байқалды.

Бағаның ең аз өсуі Атырау (3,7%), Батыс Қазақстан (10,7%) және Қызылорда (11%) облыстарында байқалды.

Жыл басынан бері алтын неке жүзіктері 37,2% қымбаттады (бір жыл бұрынғы кезеңде 4,5% қымбаттаған).

Қарашада сектордағы баға өзгерген жоқ, бірақ бір наурыздың өзінде ғана баға 27,8% күрт қымбаттады.

Ескерту: 2022 жылғы қаңтар–қыркүйек айларында ҚР-да 98,3 мың неке тіркелді, бұл 2020 жылғы «коронадағдарыс» кезін есепке алмасақ, соңғы жылдардағы ең төменгі көрсеткіш. 2021 жылдың сәйкес кезеңімен салыстырғанда қазақстандықтар 6,7% аз некеге тұрды. Соның ішінде қалада некеге тұрғандар саны 10,7% азайып, 66,4 мыңға дейін, ал ауылдық жерде, керісінше, 2,9% көбейіп, 31,8 мыңға жетті.

Әрине, алтын неке сақинаның күрт қымбаттауы некелесуге кедергі келтіруі екіталай, бірақ енді қыз бен жігіт кездесіп жүрген кездегі шығын көбейеді. Өйткені биылғы қараша айының қорытындысы бойынша, мысалы, раушан гүлдері (70 см) бір жылда 18%, мейрамханадағы түскі ас 19%, шарап 15,3%, шоколад 23,4% қымбаттаған.