ҚР-дағы сатылымда Chevrolet және Hyundai дәстүрлі түрде көшбасшы

LMC Automotive мәліметінше, әлемде жаңа жеңіл автокөлік пен жеңіл коммерциялық көлік сатылымы былтырғы көрсеткішке жақындап қалды, 2022 жылдың қаңтар–қазан айларында 66,6 млн дананы құрады. Былтырғыдан бар болғаны 0,9% аз. Дегенмен, әлем бойынша жаңа автокөлік сатылымының қалпына келуіне, ең алдымен, автокөлік нарығының көшбасшысы — Қытайдың саудасы 8,2% өсіп, 21,9 млн данаға дейін көбеюі әсер етті.

Басқа елдерде — көлік нарығының алпауыттарында биылғы сатылым өткен жылғыдан әлі де төмен. Мәселен, АҚШ-та биылғы қаңтар–қазан айларында жаңа автокөлік сатылымы 11,3 млн болды, бұл былтырғыдан 10,8% аз. Сатылым Батыс Еуропада 9,6%, Жапонияда 7,2%, Оңтүстік Кореяда 4,2%, Шығыс Еуропада (Түркияны қосқанда) 29,1% азайды. Көршілес Ресейде жаңа көлік сатылымы бірден 59,6% төмендеді.

Ал Қазақстандағы жағдайдың жақсырақ екені сөзсіз: 2021 жылдың қаңтар–қазан айларымен салыстырғанда биылғы он айда сатылым 0,9% өсіп, 97,7 мыңға жетті.

ҚР-дағы жаңа автокөлік сатылымында брендтер ішінде, дәстүрлі түрде Chevrolet және Hyundai көшбасшы, олар республиканың автокөлік нарығының жартысынан сәл астамын құрайды.

2022 жылдың қаңтар–қазан айларында 27,6 мың жаңа Chevrolet, 22,4 мың Hyundai көлігі сатылды. Былтырғы сәйкес кезеңмен салыстырғанда Chevrolet сатылымы 10,7%, Hyundai сатылымы 15,4% өсті.

Сонымен қатар, 2022 жылдың қазан айында әлем бойынша жаңа жеңіл автокөлік пен жеңіл коммерциялық көлік сатылымы былтырғы қазан айымен салыстырғанда 10% өсіп, 7,1 млн дананы құрады.

Жапондық автокөлік нарығында айтарлықтай өсім байқалды: 28,9% көбейген. Оңтүстік Кореяда сатылым 15,1%, АҚШ-та 12,1%, Қытайда 8,2% өсті. Батыс Еуропада жаңа автокөліктердің сатылымы бір жылда 12,5% өсті, бірақ қазір максималды геосаяси шиеленіс болып жатқан Шығыс Еуропада бұл көрсеткіш 2021 жылдың қазан айымен салыстырғанда 17,9% азайды.

Ал көршілес Ресейде сатылым 63,1%, ал РФ-дан жеткізілімге қатты тәуелді Беларусьте бірден 86% қысқарды.

Қазақстанда оң үрдіс өзгерген жоқ: 2022 жылдың қазан айында дилерлер 10,7 мың жаңа көлік сатқан, бұл өткен жылдың қазан айымен салыстырғанда 4,9% артық.

Брендтер мен маркалар бойынша қазан айында Қазақстан нарығында сатылған жаңа жеңіл автокөлік пен жеңіл коммерциялық көліктердің үздік 10 моделі сатылымның 58%-ға жуығын құрады. Үздік ондыққа үш Hyundai моделі (Tucson, Accent және Elantra), үш Kia моделі (Ceed, Sportage және K5), екі Chevrolet моделі (Cobalt және Nexia), сондай-ақ Toyota LC Prado және Chery Tiggo 7 PRO кіреді.