Ағымдағы жылдың қаңтар-тамыз айларының қорытындысы бойынша ҚР-да 3,5 млн тонна қозғалтқыш отыны өндірілді, бұл 2023 жылғы қаңтар–тамыз айларына қарағанда 1,8%-ға артық.

Өндірістің басым бөлігі дәстүрлі түрде үш негізгі өңірге — Шымкент, Атырау және Павлодар облыстарына тиесілі: сәйкесінше 1,3 млн, 1,2 млн және 980,4 мың тонна бензин. Естеріңізге сала кетейік, бұл өңірлерде қазақстандық мұнай өңдеу зауыттары жұмыс істейді.

Қазақстандағы бензин бағасына келетін болсақ, ағымдағы жылдың тамыз айында ол жылына 0,8%-ға өсті. Бұл ретте жеке маркалар әртүрлі динамиканы көрсетті. АИ-98 бензині бір жылда 13,1%-ға, АИ-95/АИ-96 5%-ға қымбаттады, ал АИ-92 маркалы бензиннің бағасы өзгерген жоқ.

Өңірлер бойынша бағаның ең көп өсуі Батыс Қазақстан облысында байқалды: 2,8%-ға. Бензин бағасының өсуі еліміздің 20 өңірінің 14-інде тіркелді. Алматы облысында баға өткен жылдың тамыз айындағы деңгейде сақталды, ал Жамбыл, Қызылорда, Маңғыстау және Ақтөбе облыстарында, сондай-ақ Шымкентте бензин арзандады, бірақ өте аз.

Ағымдағы жылдың тамыз айында АИ-92 маркалы бензиннің орташа бағасы 202 тг, АИ-95/АИ-96 — 254 теңге, АИ-98 — 292 теңгені құрады.

Numbeo деректеріне сәйкес, 2024 жылғы 27 қыркүйектегі жағдай бойынша Қазақстанда бір орташа айлық жалақыға 1,2 мың литр бензин сатып алуға болады. Бұл көрсеткіш бойынша еліміз әлемдегі 97 елдің ішінде 32-орынға тұрақтады. Айта кетейік: Қазақстан ТМД елдерінің арасында ең жоғары көрсеткішке ие.

Мысалы, көрші Ресейде бір жалақыға 953 литр бензин, Әзірбайжанда — 702,9 литр, Беларуссияда — 696,4 литр, Өзбекстанда — 442,2 литр, Молдовада — 434,2 литр, Арменияда — 433,4 литр, Украинада — 301 литр сатып алуға болады.

ТМД елдері арасында ең қымбат бензин Молдова мен Арменияда (1,4 АҚШ доллар), Украина (1,3 АҚШ доллар) және Өзбекстан (1 АҚШ доллар). Ал Беларуссияда төмен бағалар (0,7 АҚШ доллары), Әзірбайжан және Ресейде (0,6 АҚШ доллардан) белгіленді. Салыстыру үшін: Қазақстанда бір литр бензиннің құны 0,5 АҚШ долларды құрады.

* Украинаның ТМД-да бірқатар себептері бойынша даулы мәртебесі бар.